HIARA-MANDOVA AMIN’I KRISTY NY MPANDRESY
TENIN’ANDRIAMANITRA
Ezekiela 37:21-24
Matio 24:44-51
Apokalypsy 20:4-6
TENIN’ANDRIAMANITRA
Ezekiela 37:21-24
[Fanoharana ny amin'ny hampodiana ny Isiraely,
sy ny hanakambanana azy ho firenena iray hanjakan'i Davida]
(Ezekiela 37:21) « Dia lazao aminy hoe: Izao no lazain'i Jehovah Tompo: Indro, Izaho haka ny zanak'Isiraely avy any
amin'ny jentilisa izay nalehany, eny, hangoniko avy any amin'ny manodidina any
izy ka ho entiko ho any amin'ny taniny: » (Ezekiela 37:22)
« ary
hataoko ho firenena iray any amin'ny tany izy, dia any an-tendrombohitry ny
Isiraely, ary mpanjaka iray ihany no ho mpanjakan'izy rehetra, ka tsy ho
firenena roa intsony izy ary tsy hisaraka ho fanjakana roa intsony. »
(Ezekiela 37:23) « Ary tsy handoto tena amin'ny sampiny, na amin'ny
fahavetavetany, na amin'ny fahadisoany intsony izy; fa hovonjeko ho afaka
amin'ny fonenany rehetra izay nanotany izy, ary hodioviko izy, ka dia ho oloko,
ary Izaho ho Andriamaniny. »
(Ezekiela 37:24) « Ary
Davida Mpanompoko no ho Mpanjakany; ary hiray Mpiandry izy rehetra, dia handeha
araka ny fitsipiko izy sady hitandrina ny lalàko sy hankatò izany. »
Amin’ny Fanjakana arivo taona no hiseho izay
ambaran’ny faminanina eto.
Ampitahao amin’Isaia 11:11-16, manao hoe:
[Ny amin'ny famonjena hataon'Ilay Solofon'i
Davida, sy ny hira fiderana hatao amin'izany] (Isaia 11:11) « Ary amin'izany andro izany
ny Tompo dia mbola haninjitra ny tànany fanindroany hanavotra ny olony, izay
mbola sisa, avy any Syria sy Egypta sy Patrosa sy Etiopia sy Elama sy Sinara sy
Hamata Ary ny avy any amin'ny moron-dranomasina. » (Isaia 11:12) « Dia
hanangana faneva ho an'ny jentilisa Izy ka hamory ny Isiraely izay voaroaka sy
hanangona ny Joda izay voaely Avy any amin'ny vazan-tany efatra. » (Isaia
11:13) « Ary hitsahatra ny fialonan'i Efraima, ary hofongorana ny
fandrafiana* an**'i Joda: Efraima tsy hialona an'i Joda, Ary Joda tsy handrafy
an'i Efraima.[*Na: mpandrafy][**Na: ao amin'ny] » (Isaia 11:14) « Fa
hipaoka ny tanin'ny Filistina any andrefana ireo sy hiara-mamabo ny zanaky ny
atsinanana; amin'i Edoma sy Moaba no haninjirany ny tanany, ary ny taranak'i
Amona hanoa azy. » (Isaia 11:15) « Ary Jehovah handritra* ny
sakeli-dranomasina Egyptiana ary haninjitra ny tànany amin'ny ony** ka hamely
azy amin'ny rivony mahamay Ka hampisaraka azy hisampana fito Ary hahatafita ny
olona tsy miala kapa.[*Na: hanao azy ho herema][**Eofrata] » (Isaia 11:16)
« Ary hisy lalana voavoatra halehan'ny olony sisa, izay sisa avy any
Asyria, dia toy ny ho an'ny Isiraely
tamin'ny andro niakarany avy tany amin'ny tany Egypta. »
Matio 24:44-51
[Ny nanambaran’i Jesosy ny handravana an’i
Jerosalema sy ny hihaviany indray]
(Matio 24:44) « Koa miomana kosa ianareo; fa amin'izay ora tsy ampoizinareo no hihavian'ny Zanak'olona. »
(Matio 24:45) « Iza moa no mpanompo mahatoky sy manan-tsaina, izay
notendren'ny tompony hifehy ny mpanompony mba hanome azy hanina amin'ny
fotoana? » (Matio 24:46) « Sambatra
izany mpanompo izany, raha avy ny tompony ka hahita azy manao izany. »
(Matio 24:47) « Lazaiko aminareo
marina tokoa: Hotendreny ho mpanapaka ny fananany rehetra izy. »
(Matio 24:48) « Fa raha manao anakampo izany mpanompo ratsy fanahy izany
hoe: Maharitra ela ny tompoko, » (Matio 24:49) « ka dia mikapoka ny
mpanompo namany izy ary mihinana sy misotro amin'ny mpimamo, » (Matio
24:50) « dia ho avy ny tompon'izany mpanompo izany amin'ny andro izay tsy
ampoiziny sy amin'ny ora izay tsy fantany, » (Matio 24:51) « dia
hotapahiny roa* izy ka homeny anjara any amin'ny mpihatsaravelatsihy; any no
hisy ny fitomaniana sy ny fikitroha-nify.[*Na: hokapohiny mafy] »
Amin’ny Fanjakana
arivo taona no hiseho izay ambaran’ny faminanina eto.
Matio 24: 44-46, Ampitahao amin’ny Lioka 19: 12-27, Fanoharana ny amin’ny farantsa folo, manao hoe:
(Lioka 19:12) « Dia hoy Izy: Nisy
andriandahy anankiray nandeha nankany an-tany lavitra mba handray fahefana
hanjaka, dia hiverina. » (Lioka 19:13) « Dia niantso folo lahy
tamin'ny mpanompony izy ary nanome azy farantsa* folo ka nanao taminy hoe:
Mandrantoa mandra-pihaviko. » (Lioka 19:14) « Fa ny vahoakany* nankahala
azy, dia nampitondra teny nanaraka azy nanao hoe: Tsy manaiky hanjakan'iny
lehilahy iny izahay.[*Na: vahoaka namany] » (Lioka 19:15) « Ary nony
tafaverina izy, rehefa nandray fahefana hanjaka, dia nasainy nantsoina hankeo
aminy izany mpanompo nomeny ny vola izany mba hahitany izay azony tamin'ny fandrantoana. »
(Lioka 19:16) « Dia tonga ny voalohany ka nanao hoe: Tompoko, ny
farantsanao iray efa nahazoana tombony farantsa folo. » (Lioka 19:17)
« Ary hoy izy taminy: Tsara izany,
ry mpanompo tsara; satria nahatoky tamin'ny kely indrindra ianao, dia manapaha
tanàna folo. » (Lioka 19:18) « Dia tonga ny anankiray koa ka
nanao hœ: Tompoko, ny farantsanao iray efa tonga farantsa dimy. » (Lioka
19:19) « Ary hoy koa izy tamin'io:
Manapaha tanàna dimy koa ianao. »
Apokalypsy 20:4-6
[Ny amin’ny namatorana an’i Satana sy ny amin’ny
fitsanganana voalohany ary ny arivo taona]
(Apokalypsy 20:4)
« Ary nahita seza fiandrianana maro
aho, ary nisy nipetraka teo amboniny, ary nomena fahefana hitsara izy; ary
hitako koa ny fanahin'izay notapahin-doha noho ny filazana an'i Jesosy sy ny
tenin'Andriamanitra sy izay rehetra tsy niankohoka teo anoloan'ny bibi-dia na
teo anoloan'ny sariny ary tsy nandray ny marika ho eo amin'ny handriny na ho eo
amin'ny tànany; ary velona izy ka niara-nanjaka tamin'i Kristy arivo
taona. » (Apokalypsy 20:5) « Fa ny sisa amin'ny maty dia tsy mbola
velona mandra-pahatapitry ny arivo taona. Izany no fitsanganana
voalohany. » (Apokalypsy 20:6)
« Sambatra sy masina izay manana
anjara amin'ny fitsanganana voalohany; ireo tsy mba ananan'ny fahafatesana
faharoa fahefana, fa ho mpisoron'Andriamanitra sy Kristy ireo ka hiara-manjaka
aminy arivo taona. »
Ampitahao amin’ny Daniela 7:27, manao hoe: « Ary ny fanjakana sy ny fanapahana ary ny
fahalehibiazan'ny fanjakana eny ambanin'ny lanitra rehetra dia homena ny
olo-masin'ny Avo Indrindra; ny fanjakany dia fanjakana mandrakizay, ary ny
fanapahana rehetra dia hanompo sy hanoa Azy. »
TORITENY
Dr. Rakotondravony Daniel, Fiangonan’Andriamanitra
Miray
HIARA-MANDOVA AMIN’I KRISTY NY
MPANDRESY
NAHOANA no tena zava-dehibe ny mandresy?
Miresaka betsaka momba ny
"fandresena" ny Baiboly. Andao ho fantarina tsara ny antony
maha-zava-dehibe ny fiainana Kristiana, ary inona no ifandraisany amin'ireo
"asa" ataon'ny Kristiana nateraka indray ao amin'ny
Fanjakan'Andriamanitra.
1. Tonga lafatra ve
i Jesosy Kristy? Heb.
5: 9; 2: 9-10. Jereo indrindra ny tapany farany amin'ny andininy 10.
(Hebreo 5:9)
« ary rehefa natao tanteraka Izy, dia tonga loharanon'ny famonjena
mandrakizay ho an'izay rehetra manaraka Azy. »
(Hebreo 2:9)
« Fa Ilay natao ambany kely* noho ny anjely no hitantsika, dia Jesosy, ary
noho ny fitondrany ny fahafatesana dia voasatroka voninahitra aman-daza Izy,
mba hanandrana fahafatesana hamonjy ny olona rehetra noho ny
fahasoavan'Andriamanitra. [*Na: vetivety] » (Hebreo 2:10) « Fa
miendrika Izay anton'ny nanaovana ny zavatra rehetra sady nahariana ny zavatra
rehetra, raha mitondra zanaka maro ho any amin'ny voninahitra, ny hahatanteraka
ny Tompon'ny famonjena ireo amin'ny fahoriana. »
Inona no nolazain'i Kristy fa antenainy
amin'ireo izay milaza fa mpanara-dia azy? Mat. 5:48.
(Matio 5:48) « Koa amin izany aoka ho tanteraka ianareo toy ny
fahatanterahan'ny Rainareo Izay any an-danitra. »
Ho tonga tahaka an'iza izy ireo? Efes. 4:13.
(Efesiana 4:13) « mandra-pahatongantsika rehetra ho amin'ny
firaisan'ny finoana sy ny fahalalana tsara ny Zanak'Andriamanitra, ka ho
lehilahy lehibe, mahatratra ny ohatry ny halehiben'ny fahafenoan'i
Kristy; »
FANAMARIHANA: Araka ny hitantsika teo
aloha, Jesosy dia niresaka fahatanterahana. Fa karazana
"fahalavorariana" inona marina no noresahiny?
Amin'ny
teny grika tany am-boalohany, ny teny hoe " tanteraka " ao amin'ny Matio 5:48 dia teleios,
izay midika koa hoe "feno".
Raha lazaina amin'ny teny hafa dia nilaza i Jesosy fa ny mpanara-dia azy dia
tokony ho matotra ara-panahy amin'ny toetran'Andriamanitra.
(Matio 5:48) « Koa amin izany aoka ho tanteraka ianareo toy ny
fahatanterahan'ny Rainareo Izay any an-danitra. »
Tsy afaka ny ho tonga lafatra amin'io
lafiny io isika mandra-pahatongan'ny fitsanganana amin'ny maty, izany hoe rehefa hameno ny
fombany amintsika Andriamanitra, hanome vatana fanahy vaovao sy tonga
lafatra, miaraka amin'ny toetra tonga lafatra - tsy misy ota - izay ho tahaka
an'Andriamanitra. Saingy mandampahatongan’izany fotoana izany dia tian'Andriamanitra
hitombo amin'ny toetrany ara-panahy isan'andro isika amin'ny alalan’ny
fankatoavana ny didiny, amin'ny fandresena sy famongorana ny ota amin'ny
fiainantsika.
2. Na dia
Zanak'Andriamanitra aza Kristy ary nanana ny Fanahy Masina feno (Jaona 3:34), mbola mila mianatra mankatò ve Izy? Heb. 5: 8-9.
(Jaona 3:34) « Fa Izay nirahin'Andriamanitra dia milaza ny teniny;
fa tsy misy fetra ny fanomezan'Andriamanitra ny Fanahy. »
(Hebreo 5:8) « dia
nianatra fanarahana tamin'izay fahoriana nentiny Izy, na dia Zanaka aza; »
(Hebreo 5:9) « ary rehefa natao
tanteraka Izy, dia tonga loharanon'ny famonjena mandrakizay ho an'izay rehetra
manaraka Azy. »
"Nandresy" ve i Kristy? Jaona 16:33. Nanohitra ny
fakampanahy ve Izy? Heb. 4:15.
(Jaona 16:33) « Izany teny izany efa nolazaiko taminareo mba
hanananareo fiadanana amiko. Aty amin'izao tontolo izao no ahitanareo
fahoriana; nefa matokia; Izaho efa naharesy izao tontolo izao. »
(Hebreo 4:15) « Fa isika tsy manana mpisoronabe izay tsy mahay
miara-mitondra ny fahalementsika, fa Izay efa nalaim-panahy tamin'ny zavatra
rehetra tahaka antsika, kanefa tsy nanana ota. »
FANAMARIHANA: Jesosy
Kristy dia tonga lafatra tamin'ny alàlan'ny fisedrana sy fitsapana niainany
tamin’ny maha olombelona. Nandresy
ny fakam-panahin'ny devoly sy ny nofony ary izao tontolo izao nanodidina azy
Izy. Na dia teo aza ny fanoherana sy ny fakam-panahy dia nitandrina tsara
ny didin 'Andriamanitra Izy. Noho izany dia afaka ny ho tonga Mpamonjy ny
olombelona Izy, ary ho ohatra faratampon'ny fahamatorana ara-panahy tokony
hiezahan'ny Kristiana halain-tahaka.
3. Inona no
maha-zava-dehibe ny fandresena amin'ny fahatongavana ao amin'ny
Fanjakan'Andriamanitra sy hahazoana valisoa? Apok. 2: 7, 11, 17, 26-27; 3:
5, 12, 21; 21: 7.
(Apokalypsy 2:7) « Izay manan-tsofina, aoka izy hihaino izay
lazain'ny Fanahy amin'ny fiangonana*. Izay maharesy dia havelako hihinana ny
avy amin'ny hazon'aina, izay eo amin'ny Paradisan'Andriamanitra. [* Gr.
eklesia] »
(Apokalypsy 2:11) « Izay manan-tsofina, aoka izy hihaino izay
lazain'ny Fanahy amin'ny fiangonana*. Izay maharesy dia tsy hosimban'ny
fahafatesana faharoa. [* Gr. eklesia] »
(Apokalypsy 2:17) « Izay manan-tsofina, aoka izy hihaino izay
lazain'ny Fanahy amin'ny fiangonana*. Izay maharesy dia homeko mana miafina
sady homeko vato fotsy, ary eo amin'ny vato dia misy anaram-baovao voasoratra,
izay tsy fantatr'olona afa-tsy izay mandray azy ihany. [* Gr. eklesia] »
(Apokalypsy 2:26) « Ary izay maharesy ka mitandrina ny asako
hatramin'ny farany dia homeko fahefana amin'ny jentilisa; » (Apokalypsy
2:27) « ary hiandry azy amin'ny tehim-by izy ka hanorotoro azy toy ny
fanorotoro vilany tany, dia araka izay efa noraisiko tamin'ny Raiko. »
(Apokalypsy 3:5) « Izay maharesy dia hitafy lamba fotsy tahaka ireo
koa, ary tsy hamono ny anarany eo amin'ny bokin'ny fiainana tokoa Aho, fa
hanaiky ny anarany eo anatrehan'ny Raiko sy eo anatrehan'ny anjeliny. »
(Apokalypsy 3:12) « Izay maharesy no hataoko andry eo amin'ny
tempolin'Andriamanitro, ary tsy hiala eo intsony izy; ary hosoratako eo aminy
ny anaran'Andriamanitro sy ny anaran'ny tanànan'Andriamanitro, dia Jerosalema
vaovao, izay midina avy any an-danitra avy amin'Andriamanitro, ary ilay anarako
vaovao. »
(Apokalypsy 3:21) « Izay maharesy dia havelako hiara-mipetraka
amiko eo ambonin'ny seza fiandrianako, dia tahaka ny nandreseko kosa sy ny
niarahako nipetraka amin'ny Raiko eo ambonin'ny seza fiandrianany. »
(Apokalypsy 21:7) « Izay maharesy no handova izany zavatra izany;
ary ho Andriamaniny Aho, ary izy ho zanako. »
FANAMARIHANA: Rehefa mandresy ny
fisintonana maha-mpanota ataon'ny nofo isika, izany hoe mandresy izao tontolo
izao sy ny devoly, dia tonga lavorary ny toetrantsika ara-panahy - manorina ny
toetran'Andriamanitra isika. Ary arakaraky ny andresentsika dia vao mainka
lehibe ny andraikitra homena antsika amin'ny Fanjakan’i Kristy eto an-tany. Arak'izany
no haha-lehibe ny valisoa omena antsika!
Saingy tsy misy mandresy ho antsika. Mitaky
ezaka avy amintsika izany, miaraka amin'ny herin'ny Fanahy Masin'Andriamanitra, ho
tonga karazan'olona manana toe-tsaina sy manam-panahy azon'Andriamanitra ampiasaina
amin'ny Fanjakany.
4. Vita indray
mandeha ve ny fandresena, sa dingana maharitra mandritry ny androm-piainana?
Mat. 24:13, 45-47.
(Matio 24:13) « Fa izay maharitra hatramin'ny farany no
hovonjena. »
(Matio 24:45) « Iza moa no mpanompo mahatoky sy manan-tsaina, izay
notendren'ny tompony hifehy ny mpanompony mba hanome azy hanina amin'ny
fotoana? » (Matio 24:46) « Sambatra izany mpanompo izany, raha avy ny
tompony ka hahita azy manao izany. » (Matio 24:47) « Lazaiko aminareo
marina tokoa: Hotendreny ho mpanapaka ny fananany rehetra izy. »
FANAMARIHANA: Asehon'ny Baiboly fa ny
fiezahana hampivelatra ny toetra ara-panahin'i Kristy dia dingana mitohy
amin'ny fandresena mandritry ny fiainana Kristiana, - ny famongorana ny ota tsy ho eo amin'ny
fiainantsika, ny fianarana mifehy sy manapaka ny fisintomana midina ataon’ny
toetrantsika.
Ireo izay MADNRESY hatramin'ny farany - ireo izay mbola mitombo
amin'ny toetrany amin'ny fiverenan'i Kristy (na amin'ny fahafatesany, raha
izany no voalohany) – ireo no handova ny
Fanjakan'Andriamanitra ka hahazo valisoa!
5. Moa ve ny II
Petera 1: 5-9 koa mampiseho ny filàna fitomboana tsy an-kijanona amin'ny toetra
tsara maha Kristiana raha mbola velona ny olona iray?
(2 Petera 1:5) « koa noho izany dia manaova izay zotom-po rehetra
kosa ianareo, ka amin'ny finoanareo dia manehoa fahatanjahan-tsaina, ary
amin'ny fahatanjahan-tsainareo dia fahalalana, » (2 Petera 1:6) « ary
amin'ny fahalalanareo dia fahononam-po, ary amin'ny fahononam-ponareo dia
faharetana, ary amin'ny faharetanareo dia toe-panahy araka
an'Andriamanitra, » (2 Petera 1:7) « ary amin'ny toe-panahinareo
araka an'Andriamanitra dia fitiavana ny rahalahy, ary amin'ny fitiavanareo ny
rahalahy dia fitiavana ny olona rehetra. » (2 Petera 1:8) « Fa raha
anananareo izany zavatra izany, sady anananareo betsaka, dia tsy avelan'izany
ho malaina na tsy hahavokatra ianareo amin'ny fahalalana tsara an'i Jesosy
Kristy Tompontsika. » (2 Petera 1:9) « Fa izay tsy manana izany
zavatra izany kosa dia toa jamba ka tsy mahajery lavitra, sady nanadino ny
nanadiovana azy tamin'ny fahotany voalohany izy. »
Midika ve ny II Petera 1: 10 sy 11 fa izay
tsy manohy mitombo sy mandresy dia tsy hiditra ao amin'ny
Fanjakan'Andriamanitra?
(2 Petera 1:10) « Ary amin'izany dia mazotoa kokoa, ry rahalahy, hampitoetra
ny fiantsoana sy ny fifidianana anareo; fa raha manao izany zavatra izany
ianareo, dia tsy ho tafintohina akory mandrakizay; » (2 Petera 1:11)
« fa toy izany no hanomezana malalaka ho anareo ny fidirana ho any amin'ny
fanjakana mandrakizay, izay an'i Jesosy Kristy, Tompontsika sy Mpamonjy
antsika. »
SEKOLY SABATA
HO TONGA MPANDOVA MIARAKA AMIN'I
KRISTY
1. Satria nandresy
i Jesosy Kristy nandritry ny fiainany maha olombelona ary nateraka indray
tamin'ny fitsanganana amin’ny maty, aiza
no ipetrahany ankehitriny? Apok. 3:21.
(Apokalypsy 3:21) « Izay maharesy dia havelako hiara-mipetraka
amiko eo ambonin'ny seza fiandrianako, dia tahaka ny nandreseko kosa sy ny
niarahako nipetraka amin'ny Raiko eo ambonin'ny seza fiandrianany. »
Moa ve ny anjely, sy ny fahefana ary ny
hery rehetra nampanekena Azy eo ambany fahefan'ny Rainy? 1 Pet. 3:22; Efes. 1: 20-22;
1 Kor. 15:27.
(1 Petera 3:22) « Izay eo amin'ny tanana ankavanan'Andriamanitra;
fa efa lasa ho any an-danitra Izy ka efa nampanekena Azy ny anjely sy ny
fahefana ary ny hery. »
(Efesiana 1:20) « izay nataony tao amin'i Kristy tamin'ny
nananganany Azy tamin'ny maty sy ny nampitoerany Azy eo amin'ny tànany
ankavanana any an-danitra, » (Efesiana 1:21) « ambony lavitra noho ny
fanapahana rehetra sy ny fahefana sy ny hery sy ny fanjakana ary ny anarana
rehetra izay tononina, tsy amin'izao fiainana izao ihany, fa amin'ny ho avy
koa, »
(Efesiana 1:22) « dia nampanaiky ny zavatra rehetra ho eo
ambanin'ny tongony Izy ka nanao Azy ho Lohany manapaka ny zavatra rehetra ho
an'ny fiangonana*, [* Gr. eklesia] »
(1 Korintiana 15:27) « Fa ny zavatra rehetra efa nampanekeny ho eo
ambanin'ny tongony (Sal. 8. 6). Fa na dia hataony hoe aza: Ny zavatra rehetra
no nampanekena, dia fantatra marina fa tsy mba isan'izany Izay nampanaiky ny
zavatra rehetra Azy. »
2. Inona no ho
anarana ofisialin'i Kristy rehefa hiverina hitondra ny firenena ambonin'ny tany
Izy? Apok. 19:16.
(Apokalypsy 19:16) « Ary manana anarana voasoratra amin'ny lambany
sy ny feny Izy nanao hoe: MPANJAKAN'NY MPANJAKA SY TOMPON'NY TOMPO. »
Mbola hitatra manerana an'izao tontolo izao
mandrakizay ve ny Fanjakana be voninahitra? Isa. 9: 6-7.
(Isaia 9:6) « Ny handrosoan'ny fanapahana sy ny fiadanana dia tsy
hanam-pahataperana eo amin'ny seza fiandrianan'i Davida sy ny fanjakany, mba
hampiorenana sy hampitoerana azy amin'ny rariny sy ny hitsiny hatramin'izao ka
ho mandrakizay; ny fahasaro-piaron'i Jehovah, Tompon'ny maro, no hahatanteraka
izany. » (Isaia 9:7) « Ny Tompo mandefa teny ho an'i Jakoba, ka mihatra
amin'ny Isiraely izany. »
3. Hatraiza ny
halehiben'ny fahefana efa nolovan'i Kristy? Heb. 1: 1-2; Mat. 28:18.
[Fampitahana an'i Kristy sy ny anjely]
(Hebreo 1:1) « Rehefa
nampitenenin'Andriamanitra tamin'ny razana fahiny ny mpaminany tamin'ny andro
samy hafa sy ny fanao samy hafa; » (Hebreo
1:2) « dia amin'izao andro farany izao kosa no nampitenenany
tamintsika ny Zanany, Izay voatendriny ho Mpandova ny zavatra rehetra; Izy no
nahariany izao tontolo izao, »
(Matio 28:18) « Ary Jesosy nanatona dia niteny taminy ka nanao hoe: Efa nomena Ahy ny
fahefana rehetra any an-danitra sy ety an-tany; »
FANAMARIHANA: Amin'izao andro farany izao Andriamanitra niteny tamintsika tamin'ny
alàlan'ny Zanan-lahy Tokana izay notendreny ho mpandova izao rehetra izao!
4. Moa
ve i Kristy irery no mpandova sy mpitondra an'ity tany ity sy izao rehetra izao
midadasika izao, sa hisy ny mpiara-miasa, "mpiara-mandova"
miaraka Aminy hizara ny lovany sy ny andraikitra lehibe? Rom. 8: 16-17; Apok.
21: 7.
(Romana 8:16)
« Ny Fanahy dia miara-milaza amin'ny fanahintsika fa zanak'Andriamanitra
isika. » (Romana 8:17) « Ary raha zanaka, dia mpandova; eny, sady
mpandova an'Andriamanitra no mpiray lova amin'i Kristy koa, raha miara-miaritra
aminy isika mba hiara-manam-boninahitra aminy koa. »
(Apokalypsy
21:7) « Izay maharesy no handova izany zavatra izany; ary ho Andriamaniny
Aho, ary izy ho zanako. »
FANAMARIHANA: Ny
tena Zanak'Andriamanitra notorontoronin’ny Fanahy no tena Kristiana ankehitriny.
Mpandova, izany hoe mpiara-mandova amin'i Jesosy Kristy - voatendry handova sy
hanampy Azy amin'ny fitondrana sy fanapahana ny ZAVATRA
noforonin'Andriamanitra!
Jereo koa Hebreo 2. Nanomboka tamin'ny andininy faha-6, ny Apostoly Paoly dia naka teny tao amin'ny Salamo 8: 4-6: "Inona ny olona, no
ahatsiarovanao azy?" Eny, maninona Andriamanitra no tokony hiahy antsika
olombelona mety maty? Nateraka hanao
inona isika?
(Hebreo 2:6) « Fa ny anankiray nanambara eo amin'ny teny iray hoe:
"Inona ny olona, no ahatsiarovanao
azy? Ary ny zanak'olombelona, no amangianao azy? »
Ity no valiny: (Hebreo 2:8) « Ny zavatra rehetra dia efa nanapanekenao ho eo
ambanin'ny tongony" (Sal. 8.4-6). Fa
tamin'ny nampanekeny azy ny zavatra rehetra, dia tsy nisy izay tsy nampanekeny
azy. Nefa ankehitriny tsy mbola hitantsika fa efa ampanekena azy ny zavatra
rehetra. »
Azonao ve izany? Tena tsy
nisy izay tsy nampanekena azy ny zavatra rehetra noforonin’Andriamanitra. Ny
tanjona mahatalanjon'ny zanak'olombelona dia ny fiarahany mitantana amin'i
Jesosy Kristy ity tany ity aloha, ary avy eo dia ny tontolo midadasika (Univers)! TERAKA HANJAKA ISIKA! Rehefa mahafeno fepetra sy "ateraka indray", izany hoe nateraky ny Fanahin'Andriamanitra
amin'ny maha mpikambana ao amin'ny Fianakavian'Andriamanitra.
Hatramin'izao
dia Jesosy Kristy, "lahimatoa amin'ny rahalahy maro" (Rom. 8:29), no
nahazo izany fahefana izany. "... Nefa ankehitriny tsy mbola hitantsika fa efa ampanekena azy ny zavatra
rehetra. . Fa ny hitantsika
kosa dia Jesosy... Nosatrohana voninahitra aman-daza " (Heb. 2: 8-9). Izy irery ihany no nahazo ny
hery sy ny voninahitra tokony horaisintsika rehefa naterak'Andriamanitra koa
isika amin'ny fitsanganana amin'ny maty.
(Romana 8:29) « satria izay fantany rahateo no notendreny koa
hitovy endrika amin'ny Zanany, mba ho Lahimatoa amin'ny rahalahy maro Izy. »
(Hebreo 2:8) « Ny zavatra rehetra dia efa nanapanekenao ho eo
ambanin'ny tongony" (Sal. 8.4-6). Fa tamin'ny nampanekeny azy ny zavatra
rehetra, dia tsy nisy izay tsy nampanekeny azy. Nefa ankehitriny tsy mbola
hitantsika fa efa ampanekena azy ny zavatra rehetra. » (Hebreo 2:9)
« Fa Ilay natao ambany kely* noho ny anjely no hitantsika, dia Jesosy, ary
noho ny fitondrany ny fahafatesana dia voasatroka voninahitra aman-daza Izy,
mba hanandrana fahafatesana hamonjy ny olona rehetra noho ny fahasoavan'Andriamanitra.
[*Na: vetivety] »
Manomboka
takatrao ve ny halehiben'io fampanantenan' Andriamanitra azo antoka io?
5. Inona no
fanampian'i Kristy ny tena Kristiana ankehitriny? è
Miara-mitondra ny fahalementsika Izy: Manampy antsika HANDRESY ny fahavalo
rehetra. Heb.
4: 14-16.
[Fampitahana an'i Kristy sy ny mpisoronabe]
(Hebreo 4:14) « Koa satria Isika manana Mpisoronabe lehibe, Izay
lasa namaky ny lanitra, dia Jesosy, Zanak'Andriamanitra, aoka isika hihazona
ilay efa nekentsika. » (Hebreo 4:15) « Fa isika tsy manana
mpisoronabe izay tsy mahay miara-mitondra ny fahalementsika, fa Izay efa
nalaim-panahy tamin'ny zavatra rehetra tahaka antsika, kanefa tsy nanana
ota. » (Hebreo 4:16) « Koa aoka isika hanatona ny seza fiandrianan'ny
fahasoavana amin'ny fahasahiana, mba hahazoantsika famindram-po sy hahitantsika
fahasoavana ho famonjena amin'izay andro mahory*. [* Gr.
tandrifin'izany] »
FANAMARIHANA: Amin'ny maha
Mpisoronaben'ny zanak'Andriamanitra notorontoronin’ny Fanahy an’i Jesosy Kristy,
dia vonona hanampy azy ireo foana Izy amin'ny fotoan-tsarotra. Miahy manokana
ny fivoaran'ny fanahin'izy ireo Izy, manampy amin'ny fanomanana azy ireo
hahafahany "mandova ny zavatra rehetra" miaraka Aminy!
MAHAFENO FEPETRA HIARA-MANJAKA
AMIN'I KRISTY
Maro no gaga rehefa mahafantatra fa milaza
betsaka momba ny fitondrana ao amin'ny Fanjakan'Andriamanitra ny Baiboly. Ny sasany misalasala raha ho
afaka manapaka izy ireo, fa ny hafa kosa tsy te-hitondra mihitsy. Angamba ianao
nieritreritra hoe: Tsy te hitondra amin'izao tontolo izao rahampitso aho. Te
hanompo an’Andriamanitra fotsiny aho. Ny olana dia vitsy ny olona nahatakatra
ny dikan'ny hoe manompo.
Ny
tantara hatramin'izao dia feno tantaran'ny mpitondra, ny mpanao politika ary ny
mpiasa birao izay nanararaotra ny fahefany ary nanompo ny tombotsoany manokana,
nefa niantso ny tenany ho "mpanasoa" na mpanompo vahoaka (Lio 22:
25-26). Ny mpitondra an'izao tontolo izao rahampitso dia tsy hitovy amin'izy
ireo.
(Lioka 22:25) « Ary hoy Jesosy taminy: Ny mpanjakan'ny jentilisa
mampanompo azy ary izay manapaka azy no atao hoe mpanao soa. » (Lioka
22:26) « Fa tsy mba toy izany ianareo; fa izay lehibe aminareo dia aoka ho
toy ny zandry; ary izay manapaka dia aoka ho toy ny mpanompo. »
Jesosy Kristy, izay
nahafeno fepetra ho amin'ny toerana lehibe
indrindra amin'ny fanapahana eo ambanin'ny Ray amin'ny
fitondram-panjakan'Andriamanitra ho avy ety an-tany, dia nilaza fa tonga
mpanompo Izy! (Lioka 22:27) « Fa iza moa no lehibe, izay mipetraka mihinana va,
sa izay manompo? Tsy izay mipetraka mihinana va? Fa Izaho dia eo aminareo toy
izay manompo. » Andao
hojerentsika hoe inona no ifandraisan'ny fanompoana an'Andriamanitra amin'ny
fitondrana.
1. Ahoana no fomba
anehoan'ny Kristiana tena niova fo fanompoana an'Andriamanitra? Mat. 25:
31-40.
(Matio 25:31) « Ary raha tonga ny Zanak'olona amin'ny voninahiny,
arahin'ny anjely rehetra, dia hipetraka eo ambonin'ny seza fiandrianan'ny
voninahiny Izy; » (Matio 25:32) « ary ny firenena rehetra hangonina
eo anatrehany, dia hanavaka azy, tahaka ny mpiandry ondry manavaka ny ondry
amin'ny osy*;[*Gr: zanak'osy] » (Matio 25:33) « ary hametraka ny
ondry eo amin'ny ankavanany Izy, fa ny osy* eo amin'ny ankaviany. » (Matio
25:34) « Ary amin'izany ny Mpanjaka dia hilaza amin'izay eo amin'ny
ankavanany hoe: Avia ianareo izay notahin'ny Raiko, mandovà ny fanjakana izay
voavoatra ho anareo hatrizay nanorenana izao tontolo izao; » (Matio 25:35)
« fa noana Aho, dia nomenareo hanina; nangetaheta Aho dia
nampisotroinareo; nivahiny Aho, dia nampiantranoinareo; » (Matio 25:36)
« tsy nanan-kitafy Aho, dia notafianareo; narary Aho, dia notsaboinareo;
tao an-tranomaizina Aho, dia novangianareo. » (Matio 25:37) « Ary dia
hamaly Azy ny marina ka hanao hoe: Tompoko, oviana no hitanay noana Hianao ka
nomenay hanina, na nangetaheta ka nampisotroinay? » (Matio 25:38)
« Ary oviana no hitanay nivahiny Hianao ka nampiantranoinay, na tsy
nanan-kitafy ka notafianay? » (Matio 25:39) « Ary oviana no hitanay
narary Hianao, na tao an-tranomaizina, ka novangianay? » (Matio 25:40) « Dia hamaly ny Mpanjaka
ka hanao aminy hoe: Lazaiko aminareo marina tokoa: Araka izay efa nataonareo tamin'ny anankiray amin'ireto rahalahiko kely
indrindra ireto no nataonareo tamiko. »
FANAMARIHANA: Manompo
an'Andriamanitra isika rehefa manampy sy manompo ny mpiara-belona amintsika.
Hoy i Kristy: "Araka ny efa nataonareo tamin'ny iray amin'ireto
rahalahiko madinika indrindra ireto no nataonareo tamiko" (Matio 25:40).
Ity
tontolo mikorontana ity dia feno olona sahirana, marary ary manirery. An-jatony
tapitrisa eto amin'ity izao tontolo izao izao no mahazo tombony amin'ny
torolàlana tsotra momba ny fanatsarana ny kalitaon'ny fiainany ara-batana, ao
anatin'izany ny sakafo mahavelona sy ny fidiovana isan'andro! Fa ambonin'izany
rehetra izany dia mila mahafantatra ny fahamarinan'Andriamanitra izy ireo,
izany hoe ny tanjony sy ny Planiny ho an'ny olombelona.
Tonga hanompo i Kristy fa tsy hotompoina (Matio 20:28) « Fa tahaka izany, ny
Zanak'olona tsy tonga mba hotompoina, fa mba hanompo ka hanolotra ny ainy ho
avotra hisolo ny maro. » Ny
fombam-pivavahana amin'ny fanasana tongotra, izay naorin’i Kristy fotoana
fohy talohan'ny nanomboana Azy, dia tandindon’io toetra fanompoana io. Tokony hanahaka ny ohatra nasehon'i Kristy
momba ny fanompoana ny mpiara-belona amintsika isika (l Pet. 2:21; Jaona
13:17).
(1 Petera 2:21) « Fa ho amin'izany no niantsoana anareo; fa Kristy
aza efa nijaly hamonjy anareo ka namela fianarana ho anareo, mba hanarahanareo
ny diany; »
(Jaona 13:17) « Raha fantatrareo izany, dia sambatra ianareo, raha
manao izany. »
Ny Kristiana tena niova fo lalina dia te
hanampy amin'ny fampianarana an'izao tontolo izao ary hanampy ny hafa
handray anjara amin'ny fitahiana ara-batana sy ara-panahy azo avy amin'ny fomba
fiainan’Andriamanitra. Izany no hatao amin’ny fiverenan'i Kristy sy fananganana
ny fanapahany hitondra eto an-tany! Ny Kristiana rehetra notorontoronin’ny
Fanahy dia miofana amin'ny anjara asa lehibe manampy amin'ny fampianarana
an'izao tontolo izao ny fomban'Andriamanitra. Mianatra manampy amin'ny
fitantanana ny Fanjakana ao amin'ny Tontolo Rahampitso mahafinaritra, ho an'ny
soa ho an'ny olombelona rehetra koa izy ireo!
Ny fiainana Kristiana, avy eo, dia
fandresena, fitomboana ary fiomanana amin'ny asa fanompoana amin'ny alàlan'ny
fanapahana mandritry ny Milenioma, ary koa fanompoana ny hafa
dieny izao!
2. Inona no
hataon'ny olona masina ao amin'ny Fanjakan'Andriamanitra mandritry ny
Arivotaona? Apok. 3:21; 2:26; 5:10; 20: 4-6.
(Apokalypsy 3:21) « Izay maharesy dia havelako hiara-mipetraka
amiko eo ambonin'ny seza fiandrianako, dia tahaka ny nandreseko kosa sy ny
niarahako nipetraka amin'ny Raiko eo ambonin'ny seza fiandrianany. »
(Apokalypsy 2:26) « Ary izay maharesy ka mitandrina ny asako
hatramin'ny farany dia homeko fahefana amin'ny jentilisa; »
(Apokalypsy 5:10) « Ary efa nataonao fanjakana sy mpisorona ho
an'Andriamanitsika ireo; Ary manjaka ambonin'ny tany izy. »
(Apokalypsy 20:4)
« Ary nahita seza fiandrianana maro
aho, ary nisy nipetraka teo amboniny, ary nomena fahefana hitsara izy; ary
hitako koa ny fanahin'izay notapahin-doha noho ny filazana an'i Jesosy sy ny
tenin'Andriamanitra sy izay rehetra tsy niankohoka teo anoloan'ny bibi-dia na
teo anoloan'ny sariny ary tsy nandray ny marika ho eo amin'ny handriny na ho eo
amin'ny tànany; ary velona izy ka niara-nanjaka tamin'i Kristy arivo
taona. » (Apokalypsy 20:5) « Fa ny sisa amin'ny maty dia tsy mbola
velona mandra-pahatapitry ny arivo taona. Izany no fitsanganana
voalohany. » (Apokalypsy 20:6)
« Sambatra sy masina izay manana
anjara amin'ny fitsanganana voalohany; ireo tsy mba ananan'ny fahafatesana
faharoa fahefana, fa ho mpisoron'Andriamanitra sy Kristy ireo ka hiara-manjaka
aminy arivo taona. »
FANAMARIHANA: Novakiantsika ny hoe "seza
fiandrianana", "fitsarana" ary "manjaka.
» Ireo andinin-tSoratra Masina ireo dia milaza mazava fa ny Kristiana dia
hanana toerana ambony amin'ny Fanjakan'Andriamanitra. Izay rehetra
notorontoronin' Andriamanitra ka maharesy ankehitriny dia ho tonga "mpanjaka
sy mpisorona" (mpampianatra - Malakia 2: 7) ao amin'ny
Fanjakan'Andriamanitra. Ny anjarantsika dia fanapahana an'izao tontolo izao -
ary amin'ny farany dia amin’ny zavaboary manontolo (univers) - eo ambany fifehezan'i Kristy. Eny, nateraka hitondra isika!
3. Fitsipika
inona no ahafahan'ny olona manana fahaiza-manao tsotra eto amin'ity fiainana
ity hahafeno fepetra handray andraikitra lehibe kokoa amin'ny
fanjakan'Andriamanitra? Lioka 16:10.
(Lioka 16:10) « Ary izay mahatoky amin'ny kely indrindra dia
mahatoky koa amin'ny be; ary izay tsy marina amin'ny kely indrindra dia tsy marina
koa amin'ny be. »
FANAMARIHANA: Mianatra manapaka isika amin'ny
alàlan'ny toetra mahatoky eo amin'ny zavatra rehetra atao. Tokony
hampiharintsika eo amin'ny fiainana isan'andro ireo fitsipika sy lalàna
ianarantsika avy amin'ny Tenin'Andriamanitra. Na ilay olona mihevi-tena ho kely
fahaizana sy talenta voajanahary fotsiny aza dia afaka mahafeno fepetra hanjaka
ao amin'ny Fanjakan'Andriamanitra. Mianatra mifehy eto amin'izao tontolo izao
rahampitso isika amin'ny fianarana mitantana ny raharahantsika manokana sy ny
andraikitsika anio, na kely toy inona aza izy ireo.
Tsy mizaha tavan'olona Andriamanitra (Rom. 2:11; Gal. 3:28).
(Romana 2:11) « Fa tsy misy fizahan-tavan'olona
amin'Andriamanitra. » (Galatiana 3:28) « Tsy misy intsony na Jiosy na
Grika, na andevo na tsy andevo, na lahy sy vavy; fa iray ihany ianareo rehetra
ao amin'i Kristy Jesosy. »
Na teraka lahy na vavy isika dia tsy misy ifandraisany amin'ny
valisoantsika ao amin'ny Fanjakan'Andriamanitra. Ny valisoantsika amin'ny ho avy dia hofaritana amin'ny ambaratongan'ny
"asantsika" eto amin'ity fiainana ity ihany.
Fanamarihana: Ny fahasoavan'Andriamanitra no hidirantsika
amin'ny Fanjakany, satria fanomezana
avy amin'Andriamanitra ny tsy fahafatesana. Saingy ny asantsika no
hahamendrika hanana toeran’ny tompon'andraikitra, izany hoe fotoana hanompoana
bebe kokoa, fanaovan-tsoa bebe kokoa, raha vao teraka ao amin'ny
Fianakavian'Andriamanitra mitondra isika.
Amin'ny maha-Mpamonjy sy
zokintsika an’i Jesosy Kristy, izany hoe "lahimatoa amin'ny rahalahy
maro", dia efa nahafeno ny fepetra hanana ny andraikitra ambony indrindra
Izy, eo ambany fitarihan'Andriamanitra Ray amin'ny tontolo rahampitso. Tsy misy
olon-kafa afaka mahazo ny toeran'ny Mpanjaka nampanantenain'ny Ray Azy. Mariho
ireo toerana vitsivitsy voalaza manokana ao amin'ny Baiboly.
4. Iza
no nampanantenain'Andriamanitra fa hitondra ny firenen'ny Isiraely tafaray
indray izy? Ezek. 37: 21-22, 24.
(Ezekiela 37:21) « Dia lazao aminy hoe: Izao no lazain'i Jehovah
Tompo: Indro, Izaho haka ny zanak'Isiraely avy any amin'ny jentilisa izay
nalehany, eny, hangoniko avy any amin'ny manodidina any izy ka ho entiko ho any
amin'ny taniny: » (Ezekiela 37:22) « ary hataoko ho firenena iray any
amin'ny tany izy, dia any an-tendrombohitry ny Isiraely, ary mpanjaka iray
ihany no ho mpanjakan'izy rehetra, ka tsy ho firenena roa intsony izy ary tsy
hisaraka ho fanjakana roa intsony. »
(Ezekiela 37:24) « Ary Davida Mpanompoko no ho Mpanjakany; ary
hiray Mpiandry izy rehetra, dia handeha araka ny fitsipiko izy sady hitandrina
ny lalàko sy hankatò izany. »
Inona avy ireo toerana nampanantenain'i Jesosy homena ny Apostoly roa
ambin'ny folo tarihin'i Davida? Mat. 19:27
-28.
(Matio 19:27) « Dia namaly Petera ka nanao taminy hoe: Indro,
izahay efa nahafoy ny zavatra rehetra ka nanaraka Anao; koa inona ary no ho
azonay? »
(Matio 19:28) « Fa hoy Jesosy taminy: Lazaiko aminareo marina tokoa
fa rehefa mby amin'ny fanavaozana*, ka hipetraka amin'ny seza fiandrianan'ny
voninahiny ny Zanak'olona, ianareo koa, izay nanaraka Ahy, dia hipetraka
amin'ny seza fiandrianana roa ambin'ny folo ka hitsara ny firenen'isiraely roa
ambin'ny folo.[*Gr.fiteraham-baovao] »
Moa ve Andriamanitra niresaka momba ny hafa izay ho ao amin'ny fanjakany? Heb. 11: 4-40.
FANAMARIHANA: Mpandresy hafa no efa mialoha antsika ary ho ao amin'ny
Fanjakan'Andriamanitra. Izy ireo dia efa nahafeno fepetra handray
andraikitra ao amin'ny Fianakavian'Andriamanitra manjaka, na dia tsy
nambara tamin'izy ireo aza ny toerana voafaritra tsara nomen'Andriamanitra azy.
Saingy ny olona tsirairay dia hanana asa goavana hatao, satria ny sivilizasiona
vaovao tanteraka dia tsy maintsy apetraka ety
an-tany mandritry ny Milenioma, arak'izay nanokanan’Andriamanitra azy. Mila asa maro samy hafa sy
tena ilaina ny famerenana amin'ny laoniny ny fiarahamonina amin'izao tontolo
izao, araka ny itiavan'Andriamanitra azy.
5. Tena
hisy ve ny fotoana ampy hanompoan’ireo rehetra izay nandresy nandritry ny taona
maro? Jaona 14: 1-3.
(Jaona 14:1) « Aza malahelo ny fonareo; minoa an'Andriamanitra, ary
minoa Ahy koa*. [*Na: mino an'Andriamanitra ianareo, dia minoa Ahy koa] »
(Jaona 14:2) « Ao an-tranon'ny
Raiko misy fitoerana maro; raha tsy izany, dia efa nilaza taminareo Aho; fa
handeha hamboatra fitoerana ho anareo
Aho. » (Jaona 14:3) « Ary raha handeha hamboatra fitoerana ho
anareo Aho, dia ho avy indray ka
handray anareo ho any amiko, ka izay itoerako no hitoeranareo koa. »
FANAMARIHANA: Tamin'ny firesahana ny amin'ny tempoly ("tranon'ny Raiko") manana
"fitoerana" maro ("efitrano" ao amin'ny Revised
Standard Version sy fandikan-teny hafa), dia nasehon'i Jesosy fa hisy toerana ho an'ny mpanampy maro ao
amin'ny Fanjakan’Andriamanitra ety an-tany, rehefa i Jerosalema no ho
renivohitr'izao tontolo izao. Hoy izy hoe: "Hiverina indray aho (hiverina ety an-tany) ka handray anareo ho any
amiko, mba ho any amin'izay itoerako
[foiben'ny Tempolin'Andriamanitra eto
an-tany] no misy anareo koa"
(Jao. 14: 3).
Manome toky antsika i Kristy fa
hisy fotoana ampy sy andraikitra ambony sy mahaliana ho an'ireo rehetra teraka
ao amin'ny Fianakavian'Andriamanitra mitondra.
FEHINY
Ny tena Kristiana amin'izao fotoana izao dia tokony hanana faniriana mafy
hitondra ny fomban'Andriamanitra amin'ny fiainana eran'izao tontolo izao, izany hoe hampianatra
ny fomban'Andriamanitra mahagaga ho amin'ny fandriampahalemana, fifaliana ary
fahafaham-po. Ary ho azon'izy ireo atao izany rehefa miverina Kristy
hanangana ny fanjakan'Andriamanitra ary aterak'Andriamanitra izy ireo!
Fa mba hahatonga azy ireo mahafeno fepetra, izany hoe
voahofana tsara hanompo sy hampianatra erak'izao tontolo izao rahampitso, ny
tena Kristiana dia tsy maintsy mianatra manompo sy mampianatra dieny izao.
Ny antony tokana iantsoana ny olona ho amin'ny
famonjena ankehitriny dia ny HAHAFENO FEPETRA
manampy amin'ny fanapahana sy fampianarana erak'izao tontolo izao rahampitso - hanampy
hiantso sy hamonjy olona an'arivony tapitrisa mandritry ny vanim-potoana Millennium
sy ny Fitsaran’ilay Seza Fiadrianana Fotsy Lehibe. Tsy nifidy ny
olona sasany ho amin’ny fanasoavana manokana akory Andriamanitra ankehitriny,
fa niantso azy ireo kosa ho amin'ny tanjona
manokana, dia ASA lehibe tokony
hatao!
Ny fiainana Kristiana, noho izany,
dia iray amin'ny fanomanana asa fanompoana lehibe amin'ny tontolon'ny
rahampitso. Ny Kristiana notorontoronin’ny Fanahy dia miofana ankehitriny
hanampy amin'ny fampianarana an'izao tontolo izao ny fomban'Andriamanitra, ary
hitantana ny fitondram-panjakan'Andriamanitra ho fanasoavana ny olombelona!