AFAKA MANDRESY IANAO (Fiz.1)
TENIN’ANDRIAMANITRA
Estera 9:1-10
Jaona 15:1-10
Romana 7: 7-25
TENIN’ANDRIAMANITRA
Estera
9:1-10
[Ny naharesen'ny Jiosy ny fahavalony izay
nikasa handringana azy]
(Estera 9:1)
« Ary tamin'ny andro fahatelo ambin'ny folo tamin'ny volana faharoa
ambin'ny folo (volana Adara izany), rehefa akaiky ny andro hanatanterahana ny
tenin'ny mpanjaka sy ny didiny, dia ny andro izay efa nantenain'ny fahavalon'ny
Jiosy haharesena azy indrindra (kanjo navadika izany, ka ny Jiosy kosa no
naharesy izay nankahala azy), » (Estera 9:2) « dia nivory tany
an-tanànany avy ny Jiosy, tany amin'ny isan-tokony eran'ny fanjakan'i
Ahasoerosy mpanjaka, mba hamely izay nitady hanisy ratsy azy; ary tsy nisy
olona nahajanona teo anoloany, fa efa nahazo ny olona rehetra ny fahatahorana
azy. » (Estera 9:3) « Ary ny mpanapaka rehetra isan-tokony tamin'ny
fanjakana sy ny solo-mpanjaka sy ny governora mbamin'ny mpanao raharahan'ny
mpanjaka dia nanampy ny Jiosy, satria azon'ny fahatahorana an'i Mordekay
izy. » (Estera 9:4) « Fa Mordekay dia lehibe tao an-tranon'ny
mpanjaka, ary ny lazany niely tany amin'ny isan-tokony eran'ny fanjakana; fa
nitombo sy nisandratra ihany io lehilahy Mordekay io. » (Estera 9:5)
« Ary nasian'ny Jiosy ny fahavalony rehetra ka nokapainy sabatra sy
novonoiny ary naringany, fa nahazo nanao araka izay sitraky ny fony tamin'izay
nankahala azy izy. » (Estera 9:6) « Ary tany Sosana renivohitra aza
ny Jiosy dia nahavono sy naharingana diman-jato lahy; » (Estera 9:7)
« ary Parsandata sy Dalfona sy Aspata » (Estera 9:8) « sy Porata
sy Adalia sy Aridata » (Estera 9:9) « sy Parmasta sy Arisay sy Ariday
ary Vaizata, » (Estera 9:10) « izy folo lahy, zanak'i Hamana, zanak'i
Hamedota, fahavalon'ny Jiosy, dia novonoiny koa; kanefa ny fananany tsy mba
norobainy tsy akory. »
Jaona 15:1-10
[Ny fanoharana ny amin’ny voalobka sy ny sampany, ary
ny firaisan’i Jesosy sy ny mpianany]
(Jaona 15:1) « Izaho no tena voaloboka, ary ny Raiko no mpamboatra. »
(Jaona 15:2) « Ny sampany rehetra eo amiko izay tsy mamoa dia esoriny; fa ny
sampany rehetra izay mamoa kosa dia amboariny*, mba hamoa bebe kokoa. [*Gr
dioviny] » (Jaona 15:3) « Efa madio rahateo ianareo noho ny teniko,
izay nolazaiko taminareo. » (Jaona 15:4) « Tomoera amiko ary Izaho
aminareo. Tahaka ny sampany tsy mahay mamoa ho azy, raha tsy miray amin'ny
voaloboka izy, dia toy izany koa ianareo, raha tsy miray amiko. » (Jaona
15:5) « Izaho no voaloboka, ianareo no sampany. Izay miray amiko, ary
Izaho aminy, dia mamoa be izy; fa raha misaraka amiko kosa ianareo, dia tsy
mahay manao na inona na inona. » (Jaona 15:6) « Raha misy tsy miray
amiko, dia ariana eny ivelany tahaka ny sampany izy ka malazo; ary angonina izy
ka atsipy ao anaty afo, dia ho may. » (Jaona 15:7) « Raha miray amiko
ianareo, ka mitoetra ao anatinareo ny teniko, dia angataho izay tianareo na
inona na inona, fa ho tonga aminareo izany. » (Jaona 15:8) « Izany no
ankalazana ny Raiko, mba hamoazanareo be ka ho tonga mpianatro ianareo. »
(Jaona 15:9) « Tahaka ny nitiavan'ny Ray Ahy no nitiavako anareo; tomoera
amin'ny fitiavako ianareo. » (Jaona 15:10) « Raha mitandrina ny didiko
ianareo, dia hitoetra amin'ny fitiavako, tahaka ny nitandremako ny didin'ny
Raiko sy ny itoerako amin'ny fitiavany. »
Romana 7: 15-25
[Ny fahafahan’ny mino an’i Kristy amin’ny
herin’ny ota, ary ny fanamasinana azy]
(Romana 7:15) « Fa izay ataoko dia tsy fantatro; fa tsy izay
sitrako no ataoko; fa izay halako no ataoko. » (Romana 7:16) « Fa
raha manao ny tsy sitrako aho, dia manaiky fa tsara ny lalàna. » (Romana
7:17) « Ary amin'izany tsy izaho intsony no manao izany, fa ny ota izay
mitoetra ato anatiko. » (Romana 7:18) « Fa fantatro fa tsy misy
zavatra tsara mitoetra ato amiko, dia ato amin'ny nofoko; fa ato anatiko ihany
ny fikasana, saingy ny hahatanteraka ny tsara no tsy ato. » (Romana 7:19)
« Fa tsy ny tsara izay sitrako no ataoko; fa ny ratsy izay tsy sitrako no
ataoko. » (Romana 7:20) « Fa raha ny tsy sitrako no ataoko, dia tsy
izaho intsony no manao izany, fa ny ota izay mitoetra ato amiko. » (Romana
7:21) « Koa hitako izao lalàna izao: raha ta-hanao ny marina aho*, dia ato
amiko ihany ny ratsy. [* Na: koa hitako fa raha ta-hanaraka ny lalàna aho
hanaovako ny marina] » (Romana 7:22) « Fa mankasitraka ny
lalàn'Andriamanitra aho araka ny toetra anaty; » (Romana 7:23) « nefa
mahita lalàna hafa amin'ny momba ny tenako aho, miady amin'ny lalàn'ny saiko ka
mamabo ahy ho an'ny lalàn'ny ota izay ao amin'ny momba ny tenako. »
(Romana 7:24) « Indrisy! olo-mahantra aho! Iza no hanafaka ahy amin'ny
tenan'ity fahafatesana ity? » (Romana 7:25) « Misaotra
an'Andriamanitra aho amin'ny alalan'i Jesosy Kristy Tompontsika. Koa raha ny
amiko, dia mankatò ny lalàn'Andriamanitra aho amin'ny saiko, fa ny lalàn'ny ota
kosa amin'ny nofoko. »
FANAMARIHANA
Ny toetra araka ny nofo: manohitra an’Andriamanitra, satria avy amin’ny
devoly è Mila resena.
(Romana 8:7) « satria
fandrafiana an'Andriamanitra ny fihevitry ny nofo; fa tsy manaiky ny
lalàn'Andriamanitra, sady tsy hainy akory izany. » (Romana 8:8) « Ary izay ao amin'ny nofo dia tsy mahay manao ny
sitrapon'Andriamanitra. »
(Jakoba 3:15) « Izany fahendrena izany dia tsy ny avy any
ambony, fa araka ny ety an-tany ihany, araka ny nofo, araka ny an'ny demonia. »
Toriteny
Dr. Rakotondravony Daniel,
Fiangonan’Andriamanitra Miray
AFAKA MANDRESY IANAO!
FAMINTINANA NY BOKIN’I ESTERA
NY NANDRESEN’NY JIOSY NY
FAHAVALONY NOHO NY FAHATAHORANY AN’I JEHOVAH
Tsy
nety nandohalika sy niankohoka teo anoloan’i Hamana i Mordekay noho ny
fahatahorany an’i Jehovah, satria Jehovah irery ihany no tokony hiankohofana sy
hivavahana (Est 3:2; Deo 6:13; Mat 4:10).
è Izany koa no tokony
hataontsika Kristiana.
(Estera 3:2) « Ary ny mpanompon'ny mpanjaka rehetra izay teo
am-bavahadin'ny mpanjaka dia nandohalika sy niankohoka teo anatrehan'i Hamana;
fa izany no didin'ny mpanjaka. Fa Mordekay kosa tsy mba nety nandohalika na
niankohoka. »
(Deotoronomia 6:13) « Matahora an'i Jehovah Andriamanitrao ianao,
ka manompoa Azy, ary aoka ny anarany no hianiananao. »
(Matio 4:10) « Fa hoy Jesosy taminy: Mandehana ianao, ry Satana: fa
voasoratra hoe; Jehovah Andriamanitrao no hiankohofanao, ary Izy irery ihany no
hotompoinao (Deo. 6. 13). »
Andriamanitra
nandefa ny Jiosy ho any amin’ny fahababoana mba hanadiovany azy ireo amin’ny
fanompoan-tsampiny. è Raha mandalo fizahan-toetra isika dia ny
mba hanitsian’Andriamanitra ny diantsika sy hampiorenany ny finoantsika Azy.
Tokony ho zava-dehibe amintsika ny maha-Kristiana.
è Tahaka an’i Mordekay dia tsy
maintsy mijoro tsara sy mazava ary miaina araka ny didy sy
fitsipik’Andriamanitra sy Kristy isika. è Tsy
mitady voninahitra eto amin’izao tontolo izao.
Ny
andro namoahan’i Hamana didim-panjakana handringanana ny Jiosy dia mitovy
amin’ny andro nandidian’ny lohan’ny mpisorona hamonoana an’i Jesosy (Faha 13 Nisana,
Est 3:12; Mar 14:1-3).
(Estera 3:12) « Dia nantsoina ny mpanoratry ny mpanjaka tamin'ny
andro fahatelo ambin'ny folo tamin'ny volana voalohany, ka nosoratana izany
araka izay rehetra nandidian'i Hamana ho an'ny solo-mpanjaka sy ny governora
tamin'ny isan-tokony ary ny mpanapaka ny firenena rehetra, ho any amin'ny
isan-tokony araka ny sorany avy, ary ho amin'ny isam-pirenena araka ny fiteniny
avy; dia tamin'ny anaran'i Ahasoerosy mpanjaka no nanoratany azy ka notombohiny
tamin'ny peratra fanombohan'ny mpanjaka. »
(Marka 14:1) « Rehefa indroa andro no sisa tsy hahatongavan'ny
Paska, fihinanana ny mofo tsy misy masirasira, dia nitady hisambotra an'i
Jesosy tamin'ny fitaka ny lohan'ny mpisorona sy ny mpanora-dalàna mba hamonoany
Azy. » (Marka 14:2) « Nefa hoy izy: Tsy amin'ny andro firavoravoana,
fandrao hampitabataba ny vahoaka. » (Marka 14:3) « Ary nony tany
Betania Jesosy tao an-tranon'i Simona boka ka nipetraka nihinana, dia avy ny
vehivavy anankiray nitondra tavoara alabastara feno menaka manitra nisy narda
saro-bidy indrindra; dia novakiny ny tavoara, ka naidiny tamin'ny lohan'i
Jesosy ny menaka. »
Koa
satria ny fahafatesan’i Jesosy Kristy dia famonjena ho an’izay mino Azy, è dia nivadika ho fandringanana
an’i Hamana sy ny taranany ary ny fahavalon’ny Jiosy ny teti-dratsy nataon’izy
ireo (Est 7:9-10). Nivadika ho famonjena sy fisandratana ho
an’ny Jiosy izay natahotra an’i Jehovah izany ny teti-dratsin’i Hamana sy ireo
namany handringana ny Jiosy, (Est 8:1-2, 9).
(Isaia 54:17): «Ny fiadiana rehetra izay
voaforona hamelezana anao dia tsy hisy hambinina, ary ny lela rehetra izay
miady aminao dia horesenao lahatra. Izany no lovan'ny mpanompon'i Jehovah sy
fahamarinany avy amiko, hoy Jehovah. »
è Aza miteniteny foana na manao
fikasan-dratsy amin’ny fotoan’ireo andro firavoravoana voatendrin’i Jehovah
ireo, fa ny tenan’ireny dia an’i Kristy. « Aloky ny
zavatra ho avy ireny, fa ny tenany dia an'i Kristy. » (Kolosiana 2:17).
Tamin’ny
andro Pentekosta no navoaka ny didim-panjakana manome fandresena ho an’ny Jiosy
rehetra eo anoloan’ny fahavalony (Est 8:9), koa dia nifaly sy niravoravo izy ireo.
(Estera 8:9) « Dia nantsoina tamin'izay ny mpanoratry ny mpanjaka, tamin'ny
andro fahatelo amby roa-polo tamin'ny volana fahatelo (volana Sivana izany);
ary nosoratana araka izay rehetra nandidian'i Mordekay izany ho any amin'ny
Jiosy sy ny solo-mpanjaka sy ny governora ary ny mpanapaka amin'ny isan-tokony hatrany
India ka hatrany Etiopia, dia fito amby roa-polo amby zato toko, ny isan-tokony
araka ny sorany avy, ary ny isam-pireneny araka ny fiteniny avy, ary ny Jiosy
araka ny sorany sy araka ny fiteniny. »
è Ny Pentekosta dia andro notendren’i Jehovah
ho firavoravoan’ireo izay nandray ny batisan’ny Fanahy Masina.
è Ny Pentekosta koa dia andro
nandraisana hery avy any amin’ny Avo ho enti-mandresy ny fahavalo, dia Satana
sy ny devoly namany.
è Ny Pentekosta koa dia andro
nandraisana fanomezam-pahasoavana ho enti-manompo an’i Jehovah sy Jesosy
Kristy.
è è Tonga ny fiankohofan’ny
fahavalonao eo an-tongotrao: MANDRESY IANAO!
TOHIN’NY FANAZAVANA
Ny Kristiana vao avy
notorontoronin’ny Fanahy dia nanomboka fomba fiainana vaovao sy manaitra. Nefa
toa an'i Abrahama, sy Isaka, sy Jakoba, sy Davida ary i Paoly, dia
fantatr'Andriamanitra fa ny Kristiana dia mbola afaka manota ihany indraindray (1 Jaona 1: 8-9). Nefa Andriamanitra be famindram-po dia mampanantena
famelankeloka raha mibebaka isika; hampahery antsika Izy, hahafahana manohy
mandresy sy hahazo fiainana mandrakizay ao amin'ny Fanjakany be voninahitra.
(1 Jaona 1:8) « Raha hoy
isika: Tsy manana ota isika, dia mamita-tena, ary ny marina tsy ato
anatintsika. » (1 Jaona 1:9)
« Raha miaiky ny fahotantsika isika, dia mahatoky sy marina Izy ka mamela
ny fahotantsika sy manadio antsika ho afaka amin'ny tsi-fahamarinana
rehetra. »
Saingy ahoana marina no ahafahana
manohy mandresy, manohy mankany amin'ny tanjona mandrakizay, miezaka
mampivelatra amin’ny fiainantsika ny toetran'i Jesosy Kristy lavorary sy masina
ary marina, hahateraka antsika ao amin’ny Fianakavian' Andriamanitra? Amin'ny
alàlan'ny FINOAN'NY KRISTY - "Kristy ao anatinareo,
fanantenana ny voninahitra" (Kol. 1:27).
(Kolosiana 1:27) « izay efa tian'Andriamanitra ho nampahafantarina
ny haren'ny voninahitr'ity zava-niafina ity any amin'ny jentilisa, dia Kristy
ao anatinareo, Izay fanantenana ny voninahitra; »
Hoy i
Paoly: "MAHAY manao ny zavatra rehetra aho - handresy izay fitsapana, na fisedrana, na olana, na ota, amin'ny alàlan'i
KRISTY izay manome hery ahy!" (Fil. 4: 13.)
(Filipiana 4:13) « Mahay ny zavatra rehetra aho ao amin'ilay
mampahery ahy. »
Ary toy izany koa isika!
Eny,
amin'ny alalàn'i Kristy no ahafahantsika mampifaly an'Andriamanitra, manatanteraka
ny lalàny ary MANDRESY! Andao hofantarina.
1. Moa ve ny Apostoly Paoly izay
nahazo tsindrimandry avy tamin'ny Fanahy Masin'Andriamanitra nilaza fa ny Kristiana
dia tsy maintsy "miasa" ny famonjena azy ireo? Fil. 2:12. Jereo koa ny II Petera 1:10.
(Filipiana
2:12) « Koa amin'izany, ry malalako, tahaka ny nanekenareo mandrakariva,
tsy fony teo aminareo ihany aho, fa ankehitriny dia bebe kokoa aza raha tsy eo
aho, miasà amin'ny tahotra sy ny hovitra hahatanteraka ny famonjena anareo. »
(2 Petera 1:10)
« Ary amin'izany dia mazotoa kokoa, ry rahalahy, hampitoetra ny fiantsoana
sy ny fifidianana anareo; fa raha manao izany zavatra izany ianareo, dia tsy ho
tafintohina akory mandrakizay; »
FANAMARIHANA: Vantany vao miova fo
voalohany ny Kristiana dia manana zavatra tsy maintsy atomboka hataony, tsy
amin’izany ihany, fa mandritry ny fiainany manontolo. Ny fiainana Kristiana dia misy "asa" - misy zavatra tsy maintsy
ataony! Ny Kristiana dia tokony hiezaka mafy handresy. Hoy i Kristy: "Ny Raiko
miasa mandraka ankehitriny, ary Izaho koa miasa" (Jaona 5:17). Ny fomba fiainan'Andriamanitra dia iray amin'ny famokarana
(fitoriana ny Filazantsaran’ny Fanjakany), sy ny fitomboana (amin’ny
toe-panahy araka an’Andriamanitra) ary ny fanamby manaitra (fandresena
ny fahavalo telo mahafaty).
2. Raha izany, azo atao ve ny
mahazo famonjena amin'ny alalan’ny asantsika manokana? Rom. 6:23; Fil. 2:13; Efes. 2:
8-9.
(Romana 6:23) « Fa fahafatesana no tambin'ny ota; ary fiainana
mandrakizay no fanomezam-pahasoavana avy amin'Andriamanitra ao amin'i Kristy
Jesosy Tompontsika. »
(Filipiana 2:13) « Fa Andriamanitra no miasa ao anatinareo na ny
fikasana na ny fanaovana hahatanteraka ny sitrapony. »
(Efesiana 2:8) « Fa fahasoavana no namonjena anareo amin'ny
finoana; ary tsy avy aminareo izany, fa fanomezana avy
amin'Andriamanitra; » (Efesiana 2:9) « tsy avy amin'ny asa, fandrao
hisy hirehareha. »
FANAMARIHANA: Araka ny efa
voalaza tetsy aloha, ny fiainana mandrakizay dia fanomezan'Andriamanitra. Tsy
afaka mahazo ny famonjenao amin'ny alalan’ny asanao ianao. Na izany aza, mbola
manana andraikitra ny Kristiana.
Milaza ny Baiboly fa tokony hiala
amin'ny fahazarana sy ny ota manandevo isika. Tokony hanohitra ny fahazarana sy
ny eritreritra tsy araka an’Andriamanitra sy tsy Kristiana isika, izay hitarika
any amin'ny fahafatesana mandrakizay (Rom. 6:23). Saingy
ahoana? Amin'ny herin'ny tenantsika irery ihany ve? Tsia, satria isika tsy
afaka mandresy ny fitaoman'izao tontolo izao sy ny nofo sy ny devoly amin’ny
herin'ny olombelona irery ihany.
3. Inona ireo fahasosorana mitovy amin'izay nahazo an'i
Paoly tamin'ny fiezahany nandresy ny maha-izy azy? Vakio ny Romana 7: 15-25. Jereo indrindra ny andininy 15, 19 ary 23-24.
(Romana 7:15) « Fa izay ataoko dia tsy fantatro; fa tsy izay
sitrako no ataoko; fa izay halako no ataoko. » (Romana 7:19) « Fa tsy
ny tsara izay sitrako no ataoko; fa ny ratsy izay tsy sitrako no ataoko. »
(Romana 7:23) « nefa mahita lalàna hafa amin'ny momba ny tenako aho, miady
amin'ny lalàn'ny saiko ka mamabo ahy ho an'ny lalàn'ny ota izay ao amin'ny
momba ny tenako. (Romana 7:24) « Indrisy! olo-mahantra aho! Iza no
hanafaka ahy amin'ny tenan'ity fahafatesana ity? »
FANAMARIHANA: Hitan'i Paoly fa rehefa manandrana
manohitra ny maha olombelona azy izy dia tsy hoesorina mora foana ny fahazaran-dratsy
sy ny fahotana. Raha ny marina, rehefa nanintona ny famongorana ny fahotany
manokana ny sainy, dia toa vao mainka niharihary izany. Paoly, ilay apostoly
nomen'ny tsindrimandrin'Andriamanitra hanoratra boky telo ambin'ny folo ao
amin'ny Testamenta Vaovao, dia niantso hoe: "Lehilahy ratsy fanahy aho! Iza no hanafaka ahy amin'ny
tenan'ity fahafatesana ity?" (Romana 7:24.)
Mazava ho azy fa nandresy tokoa i Paoly. Fotoana kely
talohan'ny nahafatesany, dia nanoratra izao teny manaraka izao tamin'i Timoty
zanany lahy tanora izy: (II
Tim. 4: 6-8).
(2 Timoty 4:6) « Fa izaho dia efa hatolotra* sahady, ary efa mba
akaiky ny andro fialàko. [* Gr. haidina ho fanatitra aidina] » (2 Timoty
4:7) « Efa niady ny ady tsara aho; nahatanteraka ny fihazakazahana aho;
nitahiry ny finoana aho; » (2 Timoty 4:8) « hatrizao dia tehirizina
ho ahy ny satro-boninahitry ny fahamarinana, izay homen’ny Tompo, Mpitsara
marina, ho ahy amin izay andro izay; ary tsy ho ahy ihany, fa ho an'izay
rehetra tia ny fisehoany koa. »
Mariho tsara ny fomba
nahombiazan'i Paoly tamin'ny fandresena.
4. Inona, sa iza, no lakilen'ny
fandresen'ny Kristiana? Fil. 4:13; Jaona 15: 5; 1 Jaona 4: 4; Rom. 8:37.
(Filipiana 4:13) « Mahay ny zavatra rehetra aho ao amin'ilay
mampahery ahy. »
(Jaona 15:5) « Izaho no
voaloboka, ianareo no sampany. Izay miray amiko, ary Izaho aminy, dia mamoa be
izy; fa raha misaraka amiko kosa ianareo, dia tsy mahay manao na inona na
inona. »
(1 Jaona 4:4) « Anaka, ianareo dia avy amin'Andriamanitra ary efa
naharesy ireny, satria lehibe Izay ao aminareo noho izay ao amin'izao tontolo
izao. »
(Romana 8:37) « Kanefa amin'izany rehetra izany dia manoatra noho
ny mpandresy isika amin'ny alalan'ilay tia antsika. »
FANAMARIHANA: Jesosy Kristy, izay
efa nandresy an'i Satana (Mat. 4) ary mahafeno
fepetra ho tonga "Mpanjakan'ny mpanjaka sy Tompon'ny tompo", dia
hanampy ny Kristiana handresy an'i Satana sy ny fitaoman'izao tontolo izao
amin'ny alàlan'ny Fanahy Masina izay mitoetra ao anatiny!
Nilaza tamin’ny mpianany i Jesosy
mba hionona satria Izy efa naharesy an'izao tontolo izao (Jao. 16:33).
(Jaona 16:33) « Izany teny izany efa nolazaiko taminareo mba
hanananareo fiadanana amiko. Aty amin'izao tontolo izao no ahitanareo
fahoriana; nefa matokia; Izaho efa naharesy izao tontolo izao. »
Nilaza koa i Jaona fa Ilay
mitoetra ao amin'ny tena Kristiana marina amin'ny alàlan'ny
Fanahin'Andriamanitra dia lehibe noho i satana (1 Jao. 4: 4).
(1 Jaona 4:4) « Anaka, ianareo dia avy amin'Andriamanitra ary efa
naharesy ireny, satria lehibe Izay ao aminareo noho izay ao amin'izao tontolo
izao. »
5. Saingy nilaza ve Jesosy fa tsy
afaka nanao na inona na inona raha Izy irery? Jaona 5:30.
(Jaona 5:30) « Raha Izaho ihany, dia tsy mahay manao na inona na
inona; araka izay reko no itsarako; ary marina ny fitsarako; fa tsy mitady ny
sitrapoko Aho, fa ny sitrapon'izay naniraka Ahy. »
FANAMARIHANA: Eritrereto izany.
Na ny Zanak'Andriamanitra mihitsy aza dia nilaza fa tsy afaka manao na inona na
inona (na asa ara-panahy) amin'ny heriny olombelona fotsiny Izy. Raha i Kristy
aza, tao amin'ny nofo, tsy natoky ny Tenany, tsy mainka ve izany izaho sy
ianao, no tsy hatoky tena hoe handresy irery?
Vitsy no mahatsapa fa ny
fankatoavan'i Kristy, ary na dia ireo fahagagana nataony aza dia tsy hery
manokana mahagaga nananany no nahavitany izany. Ny asany ara-panahy REHETRA dia
natao ara-bakiteny tamin'ny alàlan'ny finoana ny herin'Andriamanitra, ary
ohatra tsara dia tsara ho antsika izany.
6. Inona no loharanon'ny finoana
mavitrika ananan'i Kristy? Jaona 14: 10-11.
(Jaona 14:10) « Tsy mino va ianao fa Izaho ao amin'ny Ray, ary ny
Ray ato amiko? Ny teny izay lazaiko aminareo, dia tsy avy amiko izany lazaiko
izany; fa ny Ray mitoetra ato amiko no manao ny asa. » (Jaona 14:11)
« Minoa Ahy fa Izaho ao amin'ny Ray, ary ny Ray ato amiko; fa raha tsy
izany, dia minoa Ahy noho ny asa ihany aza. »
FANAMARIHANA: Ilay Ray niaina tao
amin'i Jesosy tamin'ny alàlan'ny Fanahy Masina no nahatonga ny fankatoavany ny
Lalàn'Andriamanitra! Kristy dia manana ny tena
finoan'Andriamanitra.
7. Tokony hiaina amin'ny finoana
ve ny Kristiana? Heb. 10:38; Rom. 1:17.
(Hebreo 10:38) « Ary "ny oloko marina* dia ho velon'ny
finoana;" Fa raha mihemotra izy, dia tsy sitraky ny fanahiko (Hab. 2.3,
4). [* (ny marina)] »
(Romana 1:17) « Fa amin'izany no anehoana fahamarinana avy
amin'Andriamanitra avy amin'ny finoana sy ho amin'ny finoana, araka ny
voasoratra hoe: Ny marina amin'ny finoana no ho velona* (Hab. 2. 4). [*Na: Ny
marina ho velon'ny finoana] »
Nefa ny fananana finoana
an'Andriamanitra ihany ve no takiana? Rom. 3:31. Ny finoana tsy misy
fankatoavana an'Andriamanitra ve dia finoana maty? Jak. 2: 20-22.
(Romana 3:31) « Koa mahafoana ny lalàna amin'ny finoana va isika?
Sanatria izany! fa mampiorina tsara ny lalàna isika. »
(Jakoba 2:20) « Moa tsy fantatrao va, ry olom-poana, fa tsy vanona
ny finoana tsy misy asa? » (Jakoba 2:21) « Tsy nohamarinina tamin'ny
asa va Abrahama razantsika tamin'ny nanaterany an'isaka zanany teo ambonin'ny
alitara? » (Jakoba 2:22) « Hitanao fa niara-niasa tamin'ny finoana ny
asany, ary ny finoana dia notanterahina tamin'ny asa; »
FANAMARIHANA: Ny Baiboly dia
mampiseho mazava tsara fa ny Kristiana tsirairay avy dia samy manana ny
anjarany amin'ny fizotran'ny famonjena. Na eo aza izany, maro ireo milaza tena
ho Kristiana no nampianarina fa Jesosy efa niaina fiainana tsara ho antsika;
ary efa nankatò ny lalàn'Andriamanitra hisolo antsika Izy. Saingy hitantsika
anefa fa ny Kristiana iray dia tsy maintsy mandresy, tsy maintsy mitombo
amin'ny toetra ara-panahy, ary tsy maintsy miaritra na dia eo aza ny fanoherana
rehetra sy ny fakam-panahy hiala. Ny Soratra Masina dia manazava tsara fa ny
fananana finoana dia tsy manala tsiny antsika tsy hananao asa ara-panahy.
Zava-miafina lehibe ho an'izay
tsy mahatakatra izany. Koa satria tsy maintsy atao ireo zavatra ireo raha te ho
voavonjy, kanefa tsy vitantsika tanteraka samirery izany, dia ara-dalàna raha
manatsoaka hevitra izy ireo fa, na Andriamanitra naniraka an'i Jesosy hanao
izany ho antsika, ary amin'izany dia manala tsiny antsika amin'ny tsy fankatoavana
an'Andriamanitra Izy, na kivy sy mamoy fo isika ary alaim-panahy hiala amin'ny
fanandramana!
Ny tena valiny no fanalahidin'ny
famonjena: ny FINOANA; Finoana ny Herin'Andriamanitra - ilay karazana finoana
velona nananan'i Jesosy!
8. Finoana an'iza no ahafahan’ny
Kristiana manao "fahamarinana", izany hoe mankatò ny
Lalàn'Andriamanitra ara-panahy? Apok. 14:12.
(Apokalypsy 14:12) « Indro ny faharetan'ny olona masina, dia izay
mitandrina ny didin'Andriamanitra sy ny finoana an'i Jesosy. »
FR : (Apocalypse 14:12) « C’est ici la persévérance des saints
qui gardent les commandements de Dieu et la foi de Jésus. »
FANAMARIHANA: Ny Kristiana
notorontoronin’ny Fanahy dia manana ny "finoana an'i Jesosy". Tsy ny
finoantsika Azy fotsiny, fa ny finoany, izany hoe ny finoana izay nitehirizany
ny lalàn'Andriamanitra napetraka ao amintsika sy miasa ao amintsika!
9. Milaza an'i Jesosy ho
“tompony” sy “mpanefa” ny finoantsika ve ny Baiboly? Heb. 12: 2-4.
(Hebreo 12:2) « mijery an'i Jesosy, Tompon'ny finoantsika sy
Mpanefa azy, Izay naharitra ny hazo fijaliana, fa tsy nitandro henatra, mba
hahazoany ny fifaliana napetraka teo anoloany, ka dia efa mipetraka eo amin'ny
ankavanan'ny seza fiandrianan'Andriamanitra Izy. » (Hebreo 12:3) « Fa
hevero tsara Ilay naharitra ny fanoherana nataon'ny mpanota taminy*, fandrao ho
ketraka ianareo, ka ho reraka ny fanahinareo. [* Na: ireo mpanota manimba
tena] » (Hebreo 12:4) « Hianareo tsy mbola nanohitra niady tamin'ny
ota hatramin'ny fahalatsahan-drà. »
FANAMARIHANA: Ny fandikan-teny
marina kokoa ny andian-teny hoe "tompony sy mpanefa" dia "mpisava
lalana sy mpandavorary." Jesosy no nitarika ny làlana, tamin'ny
naha mpisava lalana Azy ho antsika, ary nanome antsika ny ohatra faratampony
amin'ny finoana velona. Fa Izy koa dia mandavorary ny finoany antsika! Izay
nataony tamin’ny Apostoly Paoly no ohatra maneho ny fomba anaovany izany.
FEHINY
Miezaha ho mahatoky amin'izay efa
nomen'Andriamanitra anao, mba hilazan'i Kristy anao indray andro any hoe:
"Tsara
izany, ry mpanompo tsara sady mahatoky; nahatoky tamin'ny kely ianao, dia
hotendreko ho mpanapaka be" (Mat. 25 : 2).
Ity fiainana eto an-tany ity no
toeram-piofanana. Mianatra mifehy mahatoky isika amin'ny fanatanterahana ireo
adidy, ary mianatra manapaka ny tenantsika
amin’ny fomba fiaina Kristiana.
Ny fiomanana hanjaka ao amin'ny
Fanjakan'Andriamanitra dia manomboka amin'ny fanekena ny fahefany ankehitriny.
Andriamanitra tsy hamonjy izay olona tsy feheziny. Ianaro àry ny
lalàn'Andriamanitra; Halalino sy eritrereto ary iaino. Ny Fanahy Masin'Andriamanitra
no manampy anao hitombo amin'ny toetran'Andriamanitra, hahazoanao mandresy ny
toetran’ olombelona, sy ny fakam-panahy mbamin’ny fitaoman'izao tontolo izao
hanota, ary ny teti-dratsin'i Satana devoly.
Mitadiava an'Andriamanitra
amin'ny fanatonana azy bebe kokoa amin'ny vavaka sy ny fianarana Baiboly.
Miovà! Mitomboa ara-panahy. Aoreno hatrany ny toetran'Andriamanitra
mandra-pahafatinao, na mandra-pahatongan'ny fotoana hiverenan'i Jesosy Kristy.
Amin’izay no hanovany eo no ho eo ny tenantsika malemy ara-batana, ho lasa tena
fanahy mahery, tsy misy ota, sy be voninahitra! (Fil. 3: 20-21)
(Filipiana 3:20) « Fa ny fanjakantsika dia any an-danitra, ary avy
any koa no iandrasantsika Mpamonjy, dia Jesosy Kristy Tompo, » (Filipiana
3:21) « Izay hanova ny tenan'ny fietren-tenantsika ka hitovy endrika
amin'ny tenan'ny voninahiny, araka ny fiàsan'ny heriny, izay ahaizany
hampanaiky ny zavatra rehetra ho Azy. »
Amin’izay isika dia ho vonona
hiara-manjaka amin'i Kristy - hanatanteraka ny anjarantsika mahatalanjona,
manampy amin'ny fitondrana ny tany sy izao rehetra izao, ankoatry ny maha-mpikambana
ao amin'ny Fianakavian’Andriamanitra!
Mahatalanjona sy manaitra izany.
Antso tsy mampino! Ho avy be voninahitra sy
mahafinaritra! Nanomboka nahafeno fepetra ho amin'izany ve ianao?